دارا ستری، کاریکاتێریستی کورد، کۆچی دوایی کرد

وڵات تیڤی - هەولێر

دارا ستری کاریکاتێریستی کورد لە تورکیا بەهۆی جەڵتەی دڵەوە کۆچی دوایی کرد.

علی شێخ حەمۆ، ئامۆزای کاریکاتێریستی کورد دارا ستری، بە وڵات تیڤی ڕاگەیاند: "دوێنێ 20ی1ی2025، دوای چەند ڕۆژێک لە وەرگرتنی چارەسەر، لە شاری ئەستەنبوڵ کۆچی دوایی کرد."

دارا ستری نووسەری چەندین بەرهەمە، لە ڕێگەی هونەرەکەیەوە ئازار و مەینەتیەکانی گەلی کوردی دەردەبڕی.

*بەرهەم

دوایین کارەکانی لەسەر دواکەوتنی ڕۆیشتنی شاندی هاوبەشی کورد بوو بۆ دیمەشق و پێش ئەوەش تابلۆیەکی لەسەر ئاوارەبوونی دانیشتووانی عەفرینی لە شەهبا کێشابوو.

*ژیاننامە

ناوی محەمەد شێخ حەمۆیە، خەڵکی گوندی بورجە لە نزیک شاری باب، بەڵام لە شاری حەلەب لەدایک بووە و گەورە بووە، هەروەها دانیشتووی گەڕەکی شێخ مەقسود بووە.

دوای شۆڕشی سووریا، ڕووی لە تورکیا کرد، لەوێ لەگەڵ خێزانەکەی ژیاوە، سێ ڕۆژ پێش ئێستا تووشی جەڵتەی دڵ بوو و دوێنێ کۆچی دوایی کردووە.

*لە عەفرین بەخاک دەسپێردرێت

بڕیار دراوە کە تەرمەکەی لە ناوچەی عەفرینی ڕۆژئاوای کوردستان بەخاک بسپێردرێت.